盡訴心中情

唔知有幾多人知道，其實在自殺群體中，老人家佔了很大多數。每每久不久我就會見到一個想死的老人家。

想死的原因，有一部份係因為身體差，一來受到痛苦煩擾而厭世，二來因體虛而意志薄弱。這些情況不難處理，難就難在那個人能否堅持治療。即是說，方法是有的，出路也有的，關鍵係你自己行唔行。你唔行我都無辦法，亦更加唔會停低等你，因為我還有很多人要幫要救。

另一種想死的人就難搞得多，係老人家的心結。這種人呢，越係話想死，越係死唔去。

老人家的心結十之八九離不開家人。養兒一百歲長憂九十九，非常真實，也非常殘酷。尤其上一代的女性，一輩子做別人眼中的好女兒、賢妻良母，但自己未必滿足過，也不懂得自處。

勞碌一生，佢覺得自己命苦，家人覺得佢怨婦；
老來仍然擔心仔女太遲回家，仔女卻覺得佢食古不化；
佢不計成本地對別人好，人哋老奉當佢無到。
誰是誰非，沒有通書可以讀到老。

這些時候，我們要做的，就係準備大量時間，聆聽上述事情，然後「嗯」、「係呀」、「哦〜」、「明白嘅」、「呀吓」、「。。。」，重複再重複，直到無時間，或對方無氣再講，或對方順番條氣。期間準備紙巾，輕描淡寫地閣在一旁。

這一招，對中年師奶也很管用。